Home      Platbook      Platbook 5
 

 

Titel: Platbook 5
Ondertitel: Moder Maas
ISBN: 978-90-78407-74-4
Ónger redactie van Els Diederen
Pries: 9,90
 
De presentatie waor óp zóndig 28 november um 14.00 oer in café 't ouwd Vaer in Obbeeg en waor erg gesjlaag!!.
 
Wilt u dit boek bestellen? Dat kan. In de boekwinkel of via www.ticshop.nl
 
Moder Maas, mèt häör poete en kleinkinger, ies ’t ónderwerp van diet 5de deil van Platbook, woa-in woordkunstenaere hun gedachtes en druime euver dat leveswater höbbe laote sjtruime. De volgende bekènde sjrieversj en diechtersj sjreve ’n biedraag, in hun eige Limburgs, ónder redactie van Els Diederen oet Valkeberg.

 

Jeanne Alsters-van der Hor, Venloos, Colla Bemelmans, Nuts, Han Berghs, Mestreechs, John Bovendeert, Heëlesj, Leonne Cramers, Gelaens, Theo van Dael, Kinders, Els Diederen, Valkebergs, Wim Heijmans, Kirchröadsj, Guus Kitzen, Sjipperskirks, Mariet van Knippenberg, Kessels, Jo Kostons, Beegs, Richard Leinders, Zittesj, Jan Maas, Venloos, Bep Mergelsberg, Norbiks, Ann Philipsen, Helje, Lewie Pluijmen,Valkebergs, Aat Remkes, Mestreechs, Karel Ruiten, Moferts, Maria Scheres, Groesels, Phil Schaeken, Zittesj, Joop Schaminée, Wèssems, Toos Schoenmakers-Visschers, Posters, Riky-Simons-Julicher, Zjwaams, Paul Weële, Kirchröadsj, Mien Wijnhoven, Zaerems

 
 

Mien favoriete plekske aan de Maas

 

Mien favoriete plekske aan de Maas is de ouw sjloes in Hael; vreuger gemeindje Lin. De plek in Midde-Limburg woeë de Maas dae prachtige meander vlechtj, wao van de beide puëtjes door ein verbinjingskanaal mèt sjutsjloes en ophaolbruk waere verbónje.

 

Dao - naeve de oevers vanne Maas - bön ich gebaore en höb ich van jongs af aan de Maas liere kinne in al zien facette. Inne zomer zaocht kabbelend en gladjes. Inne wintjer dreiging, hoegwater en soms wateruëverlas toet oppe binneplaats vanne boorderie wao ich gebaore bin.

 

Water is fascinerend en dèt geltj eave zier veur ’t laeve en de bedrievigheidj d’r róndjóm haer. Ich herinner mich de zunjigmörge mèt mien moder buëtjes kieke op ’t benkske naeve de sjloes. Miemere wao al die sjepe nao toe vore en waat zich achter de eindjer bevóndj. Dao wildje ich ouch nao toe, later as ich groeëter waas. Det waas de tied det t’r nog volop steinkoel en zandj en grindj nao ’t weste waerdje aafgeveurdj.

 

Dao höb ich liere visse in ’t toen nog troebele water. Ich höb d’r gezwómme op de zomer aovendje nao ’t werk op de boorderie van mien vader.  Ich verbleef t’r mèt de leefdjes van mien jeugd.

 

Imponerendj waas ouch de kinnesmaking mèt de Riekswatersjtaot. De sljoesmeisters in hun dónker, marine blauwe, goud gebiesdje pak mèt pet. Mèt name zoe as Swets, Braat en Boelens – det ware Hollenjers en die kaldje anges – en natuurlik Jo van Sjange Koeëb bie oos oet ’t dörp.

 

Ze regeldje ’t altied weer zoeë vör mie vader det de wachttied bie de ophaolbrök euver de sjloes minimaal waas as we ‘s zomers de ougst van ‘’t eilandj’ nao hoes haoldje.

De goje aafloup waerdje gewuuntegetrouw mit borrels en sigare afgezaegendj.

 

Mèt de nuje tied is de situatie ingriependj verangerdj. Door de ontgrindjinge in ’t gebied is mien dörpke noe ’n eilandj gewaore. De Clauscentrale in Maasbrach haet zien hoeg gesjpanne tentakels uëver ’t gebied oetgelagdj. ’t Lateraalkanaal waerdje gegrave en ein noew modern sjloezecomplex ingerichtj. De ouw sjloes van Lin waerdje vervolges oontmanteldj.

 

Waat blief zeen de nostalgische en oonoetwisbare herinneringe oet mien jeugd. En natuurlik de plaetjes, zoe as de bijgeveugde sjets oet de archieve vanne Riekswaterstaot.

 

Willem Schreurs (09-03-2007) oet Hael, Secretaris-Generaal van de internationaal Maas Commissie
 
 
   
 
   
 
   
©2009 Uitgeverij TIC