Home      Niet meer leverbaar      D'r herinneringskunstenaer LiLiLi 12
 

 

Titel: D'r herinneringskunstenaer
roman in 't Maers
Auteur: Joep Leerssen
ISBN: 90-76043-17-5
Pries: € 11,30
 
Fragment:
9: Carmen, Vera, Felicitas & Perpetua
(Ich druim raegelmaotig tot ich deur de kawwe heldere loch vleeg, wie aljaores, euver ’n dörp gevlaoge kaom, ’n roewe kras van herkènning oetkwaak es ich dat kesjtieël zeen, en deep, deep ónder mich, tusje peerd en buim, zeen ich ’ne jonge jong en ’ne awwere man nao mich umhoeëg lore, en ze wieze.)
 
Ze hawwe naome wie Carmen - 't Latiens veur gedich - en Vera - 't Latiens veur get wat neet gelòòge is.
Ze reje peerd op 't kesjtieël van Mehr, oe d'r baron in die jaore 'n manège haw. Ich werkde dao in miene vriejen tied en kroog peerdriejlès van d'r pikeur. Veur mich waor 't 'nen óntdèkking van twie nuuj waelte tegeliek: d'r waelt van good gesitueerde jónge vrowluuj mèt zakeluuj es pap, en d'r waelt van 't boerebedrief: sjtel oetmeste, peerd verzurge, hekke reparere en hui vare. De luuj wat dao werkde, en oe ich mèt heelp, waore manskaels wie d'r Hub Beugels en d'r Lei Berndsen zaliger. D'r Lei, wat es vriejgezèl alleing mèt zienen hónd ónder-in-Mehr woende, heet mich gelierd veur unne te braoje, en mèt d'r Lei bin ich oet gaon rieje, op peerd wat angersj neet genog bewaeging kroge, langs alle óndudelike landwaegskes rónd Mehr, en mèt 'n dröpke of 'n glaas beer in kaffees oe ich angersj noets verzeild zow zien gerak, wat van boete soms neet van 'n gewoen hoes te óndersjeie waore en oe noets 'nen officiële vergunning aan te pas is gekaome. Mèt d'r Lei bin ich aoch veur 't ursj binnegegange in Duivenmaatschappij De Snelheid in Voere, wat ieder 'n tiedscapsule waor nao de jaore-dartig es 'ne kaffee. De bazin, de Majja Hagelstein, hoosj os welkom mèt de sjelle wäörd "Ah, Mehre-piemele!"
In de sjtel en de biegeboewe van 't kesjtieël höbbe d'r Lei en d'r Hub mich hui liere berme en tractor vare, en es d'r sjmid van Mergraote keem veur peerd te besjloeë mos ich helpe mèt d'r sjmid te helpe. En dao tusjedeur sjansde ich mèt die hupse elegante rieke jóng vrowluuj wat peerdegek waore en aanbiddelik. Ich waor op hun allemaol 'n bitteke verleef, niks serieus. Alleing J. mèt häör broen krolle goof mich get fellere ónrös, mer zie vriejde mèt 'ne minsj van in de dartig mèt 'ne Mercedes. Veur de res waor 't hun riekdom, in cent en uterlik en elegantie, wat mich amuseerde en bekoorde: 'n jeunesse dorée, 'ne Franse film in 't ech.
Tusje 't ironiese snobisme en de boere-idylle sjpeulde zich dat manège-laeve op 't kesjtieël van Mehr aaf. Op 'ne zóndeg in oktober waor op 'n wei achteraaf 'n informeel dressuur- en sjpringoefening. Ich reej neet mèt mer boewde mèt d'r Lei cavaletti's op en aaf, en genoot van de zon, de frisje loch en de werme kläöre op dae gowwe herfsmeurge. Vera en Carmen zjwat-wit en blónd in riejbrook en -jeske, cap op en vötteke umhoeëg in verlichde zit, de kesjtieëlgeboewe op d'r achtergrónd - 't waor belechelik sjoen allemaol.
Opeins huur ich van oet de hieëmel 'n roew krasse en kwake. Get wie de Majja mèt krom zin.
D'r Lei en ich lore nao umhoeëg en zien 'n formatie groete veugel euvervlege, mèt flappende vlöggele, in 'ne golvende lien wat vlegenterre ummer van vörm verangert. 't Zunt gein gäös en 't zuut aoch neet oet wie ooievaars of zoeget... Dan zeet d'r Lei, verras en bewónderend: "Kroenekraone!"
Vera, Carmen, Brigitte en Angélique zal 't neet zien opgevalle. Kroenekraone, "kraanvogels", grus grus in 't Latien, lande noets in ós land. Ze kaome alleing in d'r herfs op hunnen trèk van Scandinavië nao Afrika langs de Duutsje grens euvergevlòòge. Toch höbbe-ze in 't Mehre-plat hun eige naom, 'n spesjaal woord veur hun alleing, wat de luuj van Mehr mer zelde hove oet te sjpraeke en deks jaorelang verzjwiege, reservere veur de zeldzame kiere tot ze euverkaome. Dat woord, "kroenekraone", heet d'r Lei mich doe, in dae kitsjig-sjoene setting, gelierd.
Ze zunt bekind in China en Japan, oe 't mythologiese veugel zunt. Vanwaege de vleujende, ummer verangerende vörm van hun formatie - angersj es de sjtrakke V van gäös en aende - geluive de Japanners tot ze sjrieve, lettertaekens vörme taege 't laeg blaad van d'r hieëmel.

Maer, Joep Leerssen

 
   
 
   
 
   
©2009 Uitgeverij TIC